Inteko ishinga amategeko yasubitse gahunda zari ziteganyijwe mu kunamira Senateri Mukabalisa Donatille

Oswald Niyonzima

Inteko ishinga amategeko, yahagaritse gahunda yateganyaga gukora kuri uyu wa Kane tariki 30 Nyakanga 2026 nyuma yo kumenya inkuru y’urupfu rwa Senateri Donatille Mukabalisa, wayoboyeho Umutwe w’Abadepite imyaka 11.

Urwego rushinzwe itangazamakuru n’Itumanaho mu Nteko Ishinga Amategeko, ahagana ku gicamunsi cyo kuri wa kane rwatangaje ko gahunda zari zitaganyijwe kubera muri Sena ndetse no mu mutwe w’Abadepite zahagaritswe mu rwego rwo kunamira Senateri Mukabalisa Donatille.

Uyu munsi, Sena yari kugezwaho ibisubizo mu magambo, bitanzwe na Minisitiri w’Intebe Dr Justin Nsengiyumva, ku bigiye gukorwa mu rwego rwo gukuraho imbogamizi zikigaragara mu kwihutisha kugeza ibikorwaremezo mu byanya byahariwe inganda.

Ikindi, Komisiyo y’Ubukungu n’Imari yagombaga kugenzura ibikorwa bya Guverinoma mu kugeza amashanyarazi ku baturage:Amatsinda 2 yari gusura Uturere twa Gasabo na Nyarugenge.

Inteko rusange y’Umutwe w’Abadepite yari kugezwaho raporo ya Komisiyo y’ubukungu n’ubucuruzi ku isesengura rya raporo y’igenzura ricukumbuye ryakozwe n’Urwego rw’Ubugenzuzi Bukuru bw’Imari ya Leta, kuri serivisi yo gutanga ibirango by’ubuziranenga ku bicuruzwa.